சன் பிக்சர்ஸின் எந்திரனும் பேட்டயும் !!!

கடந்த சனிக்கிழமை வெளியான “தினகரன்” நாளிதழுடன் ரஜினிகாந்தின் “பேட்ட” படத்தின் போஸ்டரை இலவச இணைப்பாக்கி ரஜினி ரசிகர்களை உற்சாகப்படுத்தியது தயாரிப்பு நிறுவனமான “சன் பிக்சர்ஸ்” !!

இது முதல்முறையல்ல..இதற்கு முன்பு சன் பிக்சர்ஸ் தயாரிக்கும் மற்றொரு படமான ஏ.ஆர்.முருகதாஸ் விஜய் கூட்டணியில் உருவாகும் “சர்கார்” படத்தின் போஸ்டரை விஜய் பிறந்தநாளை ஒட்டி தினகரன் நாளிதழோடு இலவச இணைப்பாக வெளியிட்டு விஜய் ரசிகர்களை குஷியாக்கியது.

ஆனால் “ரஜினிகாந்த்” படத்திற்கு இது இரண்டாவது முறை. இதற்கு முன் சன் பிக்சர்ஸ் முதன் முறையாக தயாரித்த இயக்குனர் ஷங்கரின் பிரம்மாண்ட திரைப்படமான “எந்திரன்” படத்தின் எக்ஸ்க்ளூசிவ் படங்களை தினகரன் நாளிதழின் முதல், கடைசி பக்கங்களில் வெளியிட்டார்கள். எந்திரன் பட இசை வெளியீட்டு விழாவையொட்டி முழுப்பக்க போஸ்டரை தினகரனுடன் இலவசமாக வெளியிட்டார்கள்.

சன் டிவியை போல் ஒரு திரைப்படத்தையோ அல்லது நிகழ்ச்சியையோ விளம்பரப்படுத்த முடியாது, அவர்களுடைய விளம்பரையுக்தியே வேறு. திரையரங்கில் ஓடாத படங்கள் கூட சன் டிவியில் நல்ல வரவேற்ப்பை பெற்றதுண்டு. தொலைக்காட்சிகளில் சன் டிவி எப்படியோ, தினசரி நாளிதழ்களில் தினகரன் முதன்மையானது.

தினகரன் ஆரம்பித்த நாள் முதல் வெறும் நாளிதழ்கள் மட்டுமே வந்து கொண்டிருந்தன. மற்ற போட்டி நாளிதழ்கள் போல் வாரமலர்,குடும்ப மலர், சிறுவர் மலர், பக்தி மலர் போன்ற வார இணைப்புகள் இல்லை. முதல் முறையாக ஞாயிறு தோறும் வரும் இலவச இணைப்பாக வசந்தம் இதழை வெளியிட்டனர்.புத்தக வடிவில் இல்லாமல் டேப்லைட் மாடலில் வெளியானது. கிட்டத்தட்ட இரண்டு வருட காலம் இதுபோலவே வெளியானது. எந்திரன் திரைப்படம் சமயத்தில் வசந்தம் இணைப்பு இதழ் புதுப்பொலிவு பெற்று மற்ற நாளிதழ்களின் இலவச இதழ்களோடு ஒப்பிடுகையில் வேறுபட்டு இருந்தது.

 

எந்திரன் படத்தின் இரண்டாம் பாகமான “2.0” படத்தை முந்தைய படத்தை போல் சன் பிக்சர்ஸ் தயாரித்து இருந்திருக்கலாம். ஏனோ அவர்கள் அதை தவற விட்டார்கள்.” 2.0″ படத்தையும் சன் பிக்சர்ஸ்சே தயாரித்து இருந்தால் இந்நேரம் அட்டகாசமாய் விளம்பரப்படுத்தி இருப்பார்கள். 2.0 படத்தின் தொலைக்காட்சி உரிமையையும் கூட சன் டிவி வாங்கவில்லை, அதனால் ஜீ குழுமம் அந்த உரிமையை பெற்றுள்ளது. இது என்னைபோன்ற சன் டிவி ரசிகர்களுக்கு ஒரு ஏமாற்றம். சிறுவயது முதலே தலைவரின் ஹிட் படங்களை சன் டிவியில் பார்த்து பழகிய எனக்கு மற்ற தொலைகாட்சிகள் தலைவர் படங்களின் உரிமையை கைப்பற்றும்போது கடுப்பாகவே இருந்துள்ளது. காரணம் சன் டிவியை போல் மற்ற தொலைகாட்சிகளில் தலைவரின் படங்கள் ஒளிபரப்பாகும் போது அது பெரிய அளவில் ஒரு ரீச் கிடைத்ததில்லை, பிக்சர் குவாலிட்டியும் மற்ற டிவியில் இருப்பதில்லை.  தற்போதும் அதே நிலைதான், 2.0 படத்தை ஜீ தமிழ் வாங்கியிருப்பது ஏற்றுகொள்ள முடியவில்லை. 

இருந்தாலும் தற்போது சன் பிக்சர்ஸ் “பேட்ட” படத்தை தயாரிப்பது மகிழ்ச்சியான ஒன்று.முதல் பார்வைக்கே எதிர்பார்ப்பை எகிறவைத்த சன் பிக்சர்ஸ்,படம் வெளியாகும் போது என்ன மாதிரியான விளம்பர யுக்திகளை கையாள்வர்கள் என எதிர்பார்த்து காத்திருக்கிறேன்…